Missionary sunday (mizo)

Thupui : Lal chhungten min nghak e
Bible : 2 Lalte 7:9
Thuhmahruai
A hmasa in vawiin Missionary Sunday ah hian missionary chu enge a nih a enge a hna, tunge lal chhungte chu, engvang in nge chanchin lawmawm chu kan hrilh ang tih 2 Lalte 7:9 na, kan chhiar zawh tak  atang khan zir ho kan tum dawn a ni. Helai chang atang hian Pathianin Suria sipai te lak atanga Samari mipui te, khawvel mite hmusit ber leh ten ber phar te hmang a a chhanchhuah dan chungchang leh phar ten a chu chanchin lawmawm an thlen chungchang kan zir dawn a ni.

Missionary chu enge a nih a enge a tum ber?
A hmasa in “missionary” tih hi latin tawng “missio” tih atanga lak chhawn a ni a, a awmzia chu tih tur emaw tum nei a kal chhuak tihna a ni a. A bik takin kohhran emaw sakhaw thil a hmun dang, ram dang a kal chhuak te hi missionary kan tih te chu an ni. Tin, missionary chuan midang tana thawhsak leh midang te rawngbawlsak a mi harsa leh rethei, damlo leh tanpui ngaite tanpuina kawnga hma la tur a midangte hneh leh chanchintha hril a an sakhua zawm ve tur leh Lal ram zau zel nana thawh hi a tum ber chu a ni.
Krista chu kan tan missionary hmasa ber a ni a,Pa in a mite min hmangaih a kan sual te kan simna tur leh chatuan nun kan neih na tur in van atangin he khawvel hrehawm ah a rawn tir a, kan tan tuar a- thi in chatuan nunna min pe a chanchintha chu a rawn thlen ta. He khawvel a a len lai khan midangte a tanpui in damlo te a tidam a, chanchintha chu hril zel in Pathian ram a zau zel nan a thawk a, zirtir thlan bik te neiin hnungzuitu leh zuitu tam tak pawh a nei a, a thi a a thawhleh hnu thleng pawhin chanchintha chu a hril a ni. Tin, he khawvel a chhuahsan hnu ah pawh a zirtir te chuan a hna chu chhunzawmin chanchintha hril hna chu an thawk zel a, mi tam tak Krista hnungzuitu ah te an siam a Pathian ram a zau zel theih nan an theihtawp in an thihni thleng pawhin an thawk a ni. Hei hi a ni missionary hna chu Pathian ram zau zel nan thawh leh Krista chanchintha hril hi. Kan tan entawn tur tam tak min hnutchhiah a thawh tur tam tak nen.

Tute nge Lal chhungte chu ni ta?
Lal chhungte chu heta Bible a kan hmuh ang chuan lal in a cheng, khawsa te an ni a. Mahse tun hnuah hian tunge lal chhungte chu ni ta ang kan tih chuan Lalpan a a hmangaih a a tlan te, chanchintha la hrelo te hi an ni tiin kan sawi thei ang. Kan vel a mi te chanchintha hrelo a la awm tam tak te hi Lalpan a hmangaih te, a duh tak a a tlan te, a ahnenah a angchhunga awm tur  a a duh ngawih ngawih te an ni. Kristan kan zavaiin a thisenin min tlan vek a, tumah thlei bik leh duhsak bik nei lovin tlanna hmunkhatin min tlan vek a, lal chhungte kan nit a. Mahse mi tam tak, Lalpan a a hmangaih vetho te he chanchin lawmawm la hrelo te an awm a, heng mi te hi Lalpan a duh taka a tlan vetho te an ni a, keini helai hmuna ringtu awm chauh te hi nilovin, kan zavaiin Krista chuan a thisen chhuakin min tlan a, a fate ni turin min duh vek a ni.

Engvangin nge chanchin lawmawm chu kan thlen ang?
Kan sawi tak a ng khan Krista chuan kan tan tuar a thiin kan hnenah chanchin lawmawm chu a rawn thlen ta a chumi hna chhunzawm zel chu ka tih tur a lo ni ta. Kan hla bu no. 368na chang 1 & 2na ah chuan “Lal Imanuela ram zauh tur leh, a hming tana do ve tur hian, mi fing leh remhriaten an daih zo lo;………. Diabola leh a khawvel chawh buaia, baal hmaa thingthi thinte, an nunna kraws thu inthup hriattir hi, kan kovah Lalpan a nghat ta” tih kan hmu. Hei hi sawmna leh ngenna a nilova, tih tur leh thupek a ni. Chutichuan chanchintha hril chu kan tih tur a ni ta tihna nih chu. Lal chhungten chanchin lawmawm kan thlen hun chu min nghak reng tawh si, muanglo leh mahni hmasial hauh lovin thawk nghal tur kan ni.
2 Lalte bung 6 & 7 thu kan chhiar chuan suria sipaiten Samari khua kha an hual a tam nasa takin a tla tih kan hmu a. Tin, chu khawpuiah chuan phar pali an awm a, chu phar pali te hmang chuan Lapan Samari khawpui kha a chhanchuak ta tih kan hmu bawk. Suria sipaite an tlanchhiat hnu khan ei tur tam tak an hnutchhiah te kha phar te khan an hmu a, anmahni mai a ei an tum khan thil diklo a ni tih an hria, an him tawh sipaiten an khawpui an hual tawhlo a ni tih kha anmahni chauh a an hriat kha thil diklo niin an hria a chuvang chuan khawpuiah luh a lalchhungte chanchin lawmawm tak hrilh chu an tih ngei tur a ni tih an hria a chu chanchin lawmawm tak chu anmahni chauh a hrelovin lal chhungte pawh an hriattir ta. Anmahni chauh khan hriain lal chhungte kha hrilh lo ta sela hremna an tawk mai dawn tih kha an hria a chu chanchin lawmawm tak thlen chu an tih makmawh a lo ni ta.
Vawiin ah hian chanchin lawmawm chu kan dawng a kan lo hre ta, Kristan van atangin a rawn thlen a, kan damna leh kan nunna chu. He chanchin lawmawm kan dawn hi keimahni chauha kan hriat a kan zep tlat hi thil dik a ni dawn em ni? A thlawnin chanchin lawmawm chu kan dawng a thlawn vek kan pe chhuak tur ka ni. Phar pali ten anmahni chauh a chu zalenna thu chu vawng lova khua ami te hnena an thlen ang khan keini pawh hian mahni hmasial lova hmangaihna nena chanchin lawmawm chu kan thlen ve a tul a ni. Pathian thupek, chhandamna thu kan hnena lo thleng hi kan puanchhuahloh chuan hremna kan pumpelh dawn silo. Lal chhungten chu chanchin lawmawm kan thlen hun chu min nghak reng tawh a ni.

Engtin nge kan thawh ang?
Keini helai hmuna lo kal khawm te hi chu Lal hna thawk tura inpe tawh kan ni a, kal chhuak tur a intirh leh hranpa kan ngai tawhlo. Mahse enge kan tih tur chu awm cheu? Kan kalchhuak dawn a chumi hunah chuan mite kalchhuak tur leh he hna thawk tur hian kan hneh thei ang em? Chu chu a pawimawh khawp mai. Kal chhuak ve theilo te pawh thilpek lam a tan la tur a kan fuih thin hi a pawimawh khawp mai.

Tlangkawmna
A tawp ber ah chuan, Chanchin tha hril hna hi a tul si a, kan velah buh lak tur tam tak an hmin tawh a,sengkhawm tur an tlem si. Pathian hmangaihna dawngtu tan chuan engmah tilo a awm mai mai hi a theihloh a ni. Hmangaihna nen, mahni hmasialna tellovin chanchin lawmawm chu lal chhungte i hrilh thuai thuai ang u, nghakhlel takin min nghak reng tawh a ni. Kan velah, kan bulhnai kan chhehvelah ringawtah pawh mamawh tu ten min au in min nghak reng e, Lal tan thahnemngai takin I thawk ang u.
A thu kan sawi te Lalpan kan za atan mal min sawm sak rawh se. Amen.