Tumkau Ni (Palm sunday)

TUMKAU NI(PALM SUNDAY)

-          Lt.Malsawmdawngliana

“Hosana! Lalpa hminga lokal chu fakin awm rawh se. Ram lo thleng tur, kan pa Davida ram chu chawimawiin awm rawh se.Chungnung berah khian Hosana!” Marka 11:9-10

Isua pian hma khan zawlnei tam takin khawvela Isua lokal tur thu hi an puang lawk a, Jerusalema Sabengtung no chunga chuanga a luh tur thu pawh hi, a pianhma kum 100 vel kal tawhah khan Zawlnei Zakaria’n a lo puang lawk diam tawh a ni. Chu chuan lei leh van Lal ber a nih zia a ti chiang hle a ni. kan lokal tur thu hi 1990 chho velah khan lo puang ta se in awi ka ringlo, tin tuman an puang heklo ang. Lal Isua chu an puan lawk ang ngeiin alo thleng thin. Hosana hi tunah chhandam rawh kan ngen a che tihna a ni a, Jerusalema Isua a luh dawna an chawimawina a ni. Lalpa fak nan leh chawimawi nan an aw te an chhuah a, Vawiin hian kan chhuah ve dawn lawm ni.

Palestina ramah hian Tum(palm) thing a tam hle a, Jericho phei chu tum khawpui(deut 34:4) tih a ni nghe nghe a ni. Bible ah hian vawi engemaw zat alang a ni. Isuan he khawvela a hun hnuhnung lamah Jerusalem ah ropui takin a lut a, chumi atanga tunlai ringtuten kan zirtur tam tak zinga athen te kan zir ho dawn a ni.

1.Lalpan min hmang duh: Tun lai hian Pathian laka inthlahrung, Pathianin min hmang ve duhlo, min ngaidam duhlo tih ngaihtuahna hi thalai rilruah hian a tam hle thin. Khatia ropui taka Jerusalem a luh dawn khan, a chuanna turin Sabengtung no kha a thlang teh tlat a nih kha. Khang hunah khan Sakawr tha tak tak pawh a awm ngei ang, hnathawh nan leh puak phur ah te an hman thin, khawvel lal dangten  an hman ve ngailoh Sabengtungno a hmang hian engpawh, tupawh Pathianin a hmang duh vek tih a entir. Min hman duhna zawn te, kan tangkai theina zawnte chu a in anglo ang. Nimahsela hman theiha inpe te hi a hmang mai thin a ni. Sabengtung pawh hmang duh chuan nang leh kei chu min va hmang duh dawn em

2. Lalpa I chawimawi ang u : Lalpa chawimawi nan hian thil chi hrang hrang an hmang thin a, rimawi chi hrang hrang te, kut ben te, lam te Bible ah pawh tam tak kan hmu a ni. He mi ni hian mipuiten Lalpa chawimawi nana an hman chu an Aw leh ka te, an puan te, chhawlte a ni ve mai. Keini tan pawh hian Pathian chawimawi nan thil te lua leh hlu lo a awmlo a, kan thil neih engpawh hi a tana kan hlan chuan a hlu a ni. Chu mi piah lamah kan tawngkam te, kan nitin nun te hian Pathian kan chawimawiin kan chawimawilo thin. Miin chanchintha an chhiar ngun ber leh an ngaihthlak ngun ber chu nangmah kha a ni a, chuvangin kan nun, tawngkam kan uluk hle angai a ni.

3. Midang tana malsawmna : Kha tia Sa chungah chuanga ropui taka an chawimawi mek lai khan a thihna tur lam a pan tih reng tuman an hriatpui awm silo a, a ruk tak chuan helhkam leh rilru nawmlohna te pawh a nei ve ang. A chunga thil lo thleng tur kha a hre lawk veka, mahse tlan chhiatsan loin midang ten malsawmna an dawn na tur, nun kan neihna tur anih vangin a paltlang mai zawk kha ani a, a va ropui em. Nang leh kei pawh hian kan thihni tur kan pan mek lai hian midang tan malsawmna ni zel turin i in buatsaih ang u.

4. Phelh ula, han kai rawh u : Lal Isua tawngkam ngei ani a, Sabengtung no la tura a mi tirh te hnenah chuan chuan sabengtung no chu phelh ula a ti ang hian, sualin a phuar mek te chu phelh tu tur kan ni a, saltang hnenah zalenna thu sawi pawh kan mawhphurhna a ni. Sabengtungno khan amahin Lal Isua a pan ngawt theilo a, a thlunna phelh bakah hruai ala ngai a ni. Thenkhat hi chu Lal Isua hnen hruai thleng ila, tangkai tak tak turte an ni a, talent nei tha tak tak Kohhran pawhin a tangkaipui viau turte an ni. A chang chuan keimahni ngei pawh hi phelh kan ngai thin, Bawng/Sakawr a thlunna hruiin a tlin  tawh silo a, chu lai bawr vela a kual a kual ang deuh chuan , keini pawh kan inthlunna hrui hi han phelh zeuh ila, kan piah lawka, phul hmun tha em em te, thlarau lam chaw tha tak tak awm te hi kan ban pha anga, kan ei ni mai tur.

5. Ropuina Isua tan: A chuanna Sabengtung no chuan ropui a tiin amah an chawimawi emaw a ti a, nuam a ti hle mai. A nu hnena a kir hnu ah chuan mipuiin an chawimawi dan zawng zawng chu a hrilh ta vek a, a tuk ah chuan Jerusalema kal leh ngei atum thu pawh a hrilha. A nu erawh chuan thutak ah a ngaihsak lemlo. A tukah chuan Jerusalem kal tur chuan phur takin a in buatsaih leh ta a, a thiante bulah chuan a chanchin chu sawiin miten an chawimawi lai chu lo thlirve ngei turin a sawm hlawm ani. Chapo leh induh tak maiin Jerusalem lam chu a pan leh ta a, a thiante chuan amah thlir turin a hnung deuh ah an zui bawk a. A beiseiloh deuh maiin tumah chuan anlo lawm lova, engahmah anlo ngailo! Khawchhung a lut ta a, amah lo lawm chu khawilamah, hnawksak tiin tiangin anlo hlap nek ta zawk a, chutianga a awm chu a thiante chuan an nuihzatin an hmusit hle mai. A nu hnenah zak takin a tlan haw a, thil awm dan a hrilh chuan a nu chuan “Jerusalema ropui taka i luh chhan kha i hrelo ani. Nangmah lawm leh chawimawi che an nilo a, i chunga chuang Isua zawk kha alawm” tiin a hrihfiah ta a.

Kan chunga Lal Isua a chuana, kei mahnia a awm hian, miten min zah mai a, min fakin min chawimawi thin, mahse kan chungah a chuan loh chiah chuan keini ve tehlul hi tenawm mai kan ni. Chuvangin kan thusawiah te, kan rawngbawlna ah te hian ropui ve, thiamve, theihve tum viau loin, a ropui tur kha ropui tir ila, a mah a lan hunah ropuiin kan lang ve thin zawk dawn a ni.

            Lalpan malsawm rawh se.