Tuh rah seng

                        TUH RAH SENG

“Bumin awm suh u; Pathian chu hmuhsit zia a ni lo ve; miin a theh apiang, chu mi vek chu  a seng bawk dawn si a. Mahni  tisa lama thehtu chuan tisaa mi chhiatna a thlen anga; thlarau lama thehtu erawh chuan thlarauva mi chatuana nunna a seng dawn a ni” (Galatia 6: 7- 8)                                                                  -Lt. Malsawmdawngliana

Kan thu chhiar hi hrilhfiah leh chuan pawh ngai lovin a chiang tawk em em tawh a, Mizote hi lo nei hnam kan ni a, lo kan hala thlai chi hrang hrang kan thlak thin. Buh kan tuh chuan fanghma alo to ngawt ngai lova, buh vek kan thar thin. Chutiang chuan hringnunah hian chi tuhna lo pahnih kan nei a, chu chu mahni tisa leh thlarau tiin kan sawi thei awm e. Kan chi tuh seng nghal chi a awm a, nakina seng tur a awm bawk a, thih hnu a seng tur pawh ala awm cheu bawk a ni. Kan tuh rah kan seng ngei dawn a ni tih Bible in min hrilh a (Gal 6:8) chung te chu kan zirchiang dawn a ni.

Kan nu leh pa hmasa atanga misual thi ngei ngei tur kan nihna chu khawngaihna vanga ngaihdam kan ni a, ngaihdam kan ni chung pawh chuan rimtaka thawka, bianga thlantui luang zawih zawiha ei tur thawkchhuak tur kan lo ni a. Hmeichhe nau vei na tak te hi kan pi Evi thuawilohna vang vek a lo ni.

Science lamah ngei pawh hian Generation next an ti a, Tuna kan awm dan/nun dan hi kan thisen thlahchhawngah, kan fate emaw kan tute emaw hian an rawn copy ngei ngei thin an ti. Chu mi  awmzia chu vawiina ka tuh hi ka thlahten a rah an seng dawn tihna anih chu. Bible atang ngei in ilo zir ho  dawn teh ang.

Davida  Backslider  Roll a mi : Davida hming hi Bible ah vawi 860 vel lai a lang a, kan hriatchian pawl tak a ni awm e, a hming ang pu Bible ah an awm lo hrim hrim bawk a ni! Israel leh Juda-te lal ropui tak niin Pathian mihriat “Ka thinlung ang pu mi” a tih hial a ni a, Isua Krista pawh Davida thlah a mi tiin kan sawi thin. Mahse a awmlohna hmun tura a awm vangin thil sual nasa tak a ti ta a, Men’s Fellowship a inhmang rual anih chuan humsual a daia, kan tunlai Kohhran dan ang chuan dan pawnah, Backslider roll a awm ngei ngei tur a ni. A thenawmnu Bathsebi a mutpui a, chu sual thup tum chuan Bathsebi pasal Uria chu a thih ngei ngeina tur ral hmatawngah a awm tira, a thih phah ta reng a ni.

Chutiang thil a lo thlen chuan Zawlnei Nathana chuan Davida chu a zilhhau nghe nghe a, a tuh rah chu a seng ngei dawn thu a sawi a ni( 2 Sam 12:11). Zawlnei Nathana sawi ang ngei chuan Davida chhungkua ah chuan buaina namenlo tak alo awm ta a, Uria nupuiin Davida fa a hrinsak sak chu an damlo ngawt mai a, Davida chuan nasa takin Pathian au mahse Pathianin a nunna a laksak ta tho a. Chumi hnuah a fapa Absaloma farnu Tamari chu a nutapa Amnona’n a pawngsual zui a, chu thil thleng avang chuan Absaloma thinrim chuan phuba la in Amnona a that ve leh a ani. Nakinah chuan Absaloma pawh chu Davida lakah a hel ta a, Davida chu Jerusalem atangin a tlanchhiat a ngai ta hial a ni. Davidan innghak tura a dah a hmei sawm te chu chhun engah Absaloma chuan a pawl ta hlawm a( 2 Sam 15:16, 16: 20-22) A hun hnuhnung lamah pawh  Davida hi ralmuangin a awm tak tak meuh lo, a ram chhungah Pathianin hripui a lentira, mi sing sarih lai an thi a, a lo tar hnu chuan amah chauhin vawt ti takin a mu thin(1 Lalte 1:2), chutih mek lai chuan a fapa pakhat Adonija chuan lal a lo tum ve bawk a. Chutiang chuan Lal Davida chuan a tuh rah ngei chu a damlai la lain a seng chho mawlh mawlh mai a ni.

Kan plunge ministry neihna Grace Home ah chuan anmahni tuh rah senga hreawm  tuar mek tam tak an awm a, kan theih tawpin kan tanpui tur a ni mek laiin an nun dan leh khawsak dan in a zirloh a vanga an tuh rah seng te an ni mek hlawm  a ni.

Annania leh Saphiri(Tirh 5: 1-10):

He thuah hi chuan tuh rah seng nghal thu kan hmu ve leh thung a. Jerusalem khawpui a kohhran ding tir a, ringtu hmasa te niin nupa an ni. Kha tih lai khan Kristian te an in hmangaih tlang em em a, engkim an neihte chu an insem vek thin. Inhmun lo ram leh eng ilo an hralh pawn tirhkohte ke bulah an rawn la a, an in peizawn tlang thin a ni a. Annania leh Saphiri te nupa chuan an ram hralhna chu inthurualin an zep then a, tirhkohte bulah an rawn thlen kim duh lo a, Petera khan a hau hlum ta mai a nih kha. Kristian, Isua Krista zuitu in ti reng si hian thil diklo Pathian duhloh zawngte hi kan ti leh mai thin a, chu chuan rah thalo tak mai a nei tih Annania leh Saphiri te nupa atang hian kan zir thei awm e.

Mantirtu Juda Iskariot

Juda Iskariot hi Isua zirtir zinga mi a ni a, Isua zirtirte hming ziahnaah hian hnuhnung berah ziah a ni thin! Chanchintha Luka ziakah chuan ‘mi vervek Juda Iskariot’ a ti kher bawk (Lk 6:16)  Isua ngei khan a zirtirte zingah chuan Diabola a awm thu kha a sawi a, chu chu Juda Iskariot a hi a ni (Joh 6:71). Isua damlai khan Isua hnaih tak takah a awm thin a, treasurer dinhmunah hial a ding nghe nghe a, mahse lem chang mai a ni. A sum enkawl pawh chu a ei ru thin a( Joh 12:6) Lal Isua man tirtu pawh kha a mah hi a ni. A tuh rah ngei chu sengin a hun tawp lamah chuan inchhir takin a inawkhlum ta a ni.  Ziak dangah chuan a sual manin hmun pakhat a lei a, a bawkkhupin a tla a, a laiah a puak keh a, a ril zawng zawng pawh a chhuak vek a ni a ti.

Hengte hi tisa lama thehtute chanchin chu a ni. Isua zuitu ang ten an lang ve a, a then chu ringtu ang ten an lang bawk a, Lal Isua hretu leh zuitu angin lang mahse, Pathian chu bum rual a niloa, a tawpah chuan an zia tak a lo langa, an tuh rah tisa lama chhiatna chu anKan plunge ministry neihna Grace Home ah chuan anmahni tuh rah senga hreawm  tuar mek tam tak an awm a, kan theih tawpin kan tanpui tur a ni mek laiin an nun dan leh khawsak dan in a zirloh a vanga an tuh rah seng te an ni mek hlawm  a ni.

Mi hausa leh Kutdawh Lazara : Chanchintha Luka ziak bung 16: 19-30 kan en chuan  Mi hausa leh Lazara chanchin atangin kan thih hnuah hian leia kan chi tuh hi a rah kan la seng leh dawn tih kan hmu a. He leia nuamsa taka awm mi hausa kha natak tuarin hremhmunah a awm a, Kutdawh Lazara chu Abrahama angchhungah nuam takin a awm a ni. Thupuan 22:12 ah chuan “mitin an thiltih ang zela pek turin ka lawmman ka hnenah a awm a ti.

Kum 1871 khan tuna Myanmar ram chhung ni ta Mualbem khuaa Sukteho chuan khuangleng runin an khua an halsak a, mi ţhahnem tak salah an man bawk a ni, kum 144 zet liam hnu November ni 25, 2015 khan khaw pahnihte hian inremna satui tanin Pathian hnena ngaihdam dilna leh lawmthu sawina Khuanglengah an hmangho ani. Hetia an tihna chhan chu sukteho hian Pathian atanga malsawmna an dawn tur angte dawng lovin, he thil tih vang hian tun thlengin hritha lo leh thiltha lo tak tak an khuaah a thleng thin niin an ngai a ni.

 Eng chi nge kan tuh ve a, eng rah nge kan seng ve dawn le? Eng lawmman nge ka dawn ve ang a, eng thil in nge min lo hmuak ang i in ngaihtuah ang u. Kan tuh rah theuh kan seng dawn avangin, rah tha leh lawmawm seng theuh turin kan in duhsak a, hun tha kan neih lai hian kan chi tuh na lam a dik loh chuan i tuh tha leh ang u khai. Mi tam takin Men’s fellowship hi chi tha tuhna hmanruaah an hmang mek a, he rawngbawlna kal tlang hian malsawmna tam tak an dawng mek a ni. Men’s Fellowship Sunday hi i lo hmang tawh thin mai thei, vawiin erawh chu chi tha tuh tanna niah lo hmang ngei la, Men’s Fellowship dik tak zawk chu i thinlung lamah khan a lo i tan dawn nia. Chumi tura tan chuan kan thusawi te Lalpan kan tan malsawm rawh se.