Ringtu Nunnghet

RINGTU   NUNNGHET

-  Lt. Malsawmdawngliana 18/2/17

Bible text- Lalpa ringtu, a rinchhan LALPA ni erawh chu a eng a thawl e, tui kianga thingphun, lui kama zung kai, khaw lum lo thleng pawh hlau lo, A hnahte hring reng si, khawkhen kum pawisa lo, rah chhuah thulh chuang si lo ang hi a ni (Jeremia 17 : 7- 8) .

 In veng ula, rinnaah chuan ding nghet ula, intihuai ula, chaktakin awm rawh u (I korinth 16:13)

Kan Local officer  te hi ka thlira an nun a nghet ka ti. Luangthli chhem nghin ang maia, a chhemna lama awn dual dual chi kan awm lo. Nun lelo leh pawlawh tak nei a, a changa lum a changa vawt, a changa piangthar a, achanga tharlo leh mai mai tur a koh kan nilo a, kan dinna ah nghet tak leh rinawm taka thawk tura koh kan ni zawk. Gen 49 Jakoba’n a fapa Reubena hnenah “tui anga nghetlo I ni” atih ang mi kha Kristian ah hian kan tam riau a ni.

Piangthar tir midang hmu hniam nghal em em mai te, mahni thatna lai leh tihve te hre em em a, midang thatna hmu ve thei hauhlo te. Midang tlinlohna lai sawi chat chat thei te, an nun a nghet thei ngailo. An piangthar hlim viau emaw tih laiin an lo da leh hman thin. Nunnghet nei tur hian nitin kan in chiah angai a, a thu chhiar leh tawngtaiah te, kohhran programme, inkhawm leh fellowship, chawnghei tawngtai leh hnatlang, thilpek thlenga tan kan lak reng a tul hle a ni.

Sadraka, Mesaka, Abed negoa – Rangkachak milim be duhlo chu meipuiah paihluh tur tiin lalin thuchhuah a siama, Daniela thiante hian chibai an buk duh ta tlatlo mai, meipui chu a let sarihin an ti sa , a paihluttu te pawh an thi hial a. An ni pathum erawh chuan he meipui ata hi kan Pathian chuan min chhanchuak thei, Min chhanchhuak dawnlo mahse I milim chu chibai kan buk chuang hek lo ang an ti sam et mai si. An rinah hian an chiangin, thihna hlimkaw ruamah pawh an va dingnghet tehlul em, “min chhanchhuak dawnlo mahse” tih lai hi a ropui in entawn tur tam tak min hnutchhiah a ni. Keini chu Engmaw mai mai vangin kan inhlanna ah kan dingnghet theilo fo thin. Eg. Zuk leh hmuam, pawisa, nulat tlangvalna, zu. Kan khawtual nun ah pawh kan Kristianna hi a nghet tur a ni.

Nova – A nghehzia chu vawikhat Lalpa aw a hriat kha kum za chhung a ring tawp. A ringhlel lo reng reng. Keini chu harsatna leh natna kan tawk a, kan ringhlel leh thin. Kan piantharna te pawh min rinhlelh tir thin.  Kan chuanna lawng hi thlipuiin rawn nam sawk sawk mahse, tuipuite chu rawn phul but but in , kan rinloh lam atangin tawngkam na tak dawngin, hnunglam atangin min vawmin min rel zui dawn mahse Lalpa lamah dingnghet tlat tur ka ni.

He hringnun khualzin kawngah hian thil chi hrang hrang tam tak kan tawk a, a changin ni a sa a, a changin ruah a sur thin. A chang chuan hlimna in kan khata, khawvel hi nuam kan tiin kan hlim hle thin , chumi hlimna chu a chang chuan lungngaihna in a zui chawk a, khawvel nuam kan tih chu khawvel hrehawmah alo chang leh thin. A tuar thiam lo deuh tan chuan mahni intihhlumna thlen thei khawp a lunngaihna nasa a lo thleng a, chung ang hunah chuan kan zai hlimna zawng zawng vawmbo ang duak a ni a, Pathiana kan lawmna te pawh chu van lama chho ta vek ang mai a ni. Chung hunah tak chuan ringtu nun nghet nei, beidawng miahlo a rinna nei tlat mi nih chu a pawimawh  thin a ni.

Lemziak thiam : Tum khat chu lemziak thiam pakhat hian Isua lem ziah a tum a, Bajarah a va kala mipui tam tak kal nuai nuai karah chuan Isua ang ber nia a hriat chu alo pawt thu hnawk a, a lem a ziak ta mawlh mawlh mai. A ziah zawh chuan tha a tiin ziak ang a in ti hle a ni. A kar leh ah chuan Iskariota lem ziah leh a tum ta a, a hma a atih dan kha tha hle in a hria a, bajarah chuan ava kal leh ta a, Iskariota ang a tih ber chu alo pawt thu chawta ,a ziak leh ta mawlh mawlh mai a, chu pa chuan mak ti tak in “Ka pu kar hmasa lawk khan, he lai hmunah tho hian ka lem kha  I ziak tawh sia, engti ziange i ti bo nge tunah ilo tih leh tak mai? a ti a. Lemziaktu chuan mak ti takin “a va mak tak ve, kar hmasa khan Isua i an teh reng nen, engtizia nge mantirtu Iskariota I va ang leh ta em! ati a.

Hetiang deuh hian then khat chu kan tih laiin kan ti hluai a, Piangthar tha ber da ve thei tawhlo tur hmel pu, mi ai chang sang inti, inti hre em em mai te. Thlaraua khat in ti, Kohhran upa leh mi dang te hmu ro nghal em em mai te, mahse reilo te ah an da leh mai thin te kan ni.

Mi pakhat chu a piangthar hnem tawh em em a, camp pawh vawi engemaw zat a lut chhuak tawh. Camp atanga a rawn chhuah chuan thenawm khawveng tan a hlauawm ting mai, mi rin a hlawh lai tak kha thilruk na hun remchangah te alo hmang thin a.

Josepha- A unau ten sumdawng hnenah an hralah, Aigupta ramah salah a awm anih kha, mahse Pathian lakah a rinawm tlat a, a Pathian biakah a chiangin a ngheta, Aigupta Pathian a be ve duh lo. Pathianin a chawi sang zel a, a chhan chu a ngheh em vang a ni.

Zirtirna danglam leh tharah hian mi tam tak an buai. Kan thurin leh innghahna lo chu thildang a awm lo, chanchintha dang a awm lo. Paul an, Korinth mite hnenah te, Galatia mite hnenah te, thinrim takin a sawi. “ chanchin tha kan hrilh che u lo chu, chanchin tha dang a awmlo; van a tanga lo chhuk van tirhkoh pawh ni se chutiang lo hrilh tu che u chu anchhe dawngin awm rawh se”(gal 1:8)

Mi thlarau chan ang te, an dawn angte lo zir a lo tih vak angailo, Pathianin kan mamawh tawk leh kan tana tha tur zelin ro a rel. Speaker leh a ngaithlatu hriat leh chanchin a in ang theilo, puithiam tih tur leh Pathianin a dahna hmun te leh kohhran mipuite chan leh dinhmun a in anglo. Mi tam tak kan fail fo thin na chhan chu, kan hringnunah hian Question paper hran theuh kan dawng ani tih hrelo a, midang paper kan lo copy thin vang a ni.

A lam thiam thiam hi a da leh hma an tan chang a awm a, hnehna puan tuma au ring ber kha a thlemna hnehlo tu hma sa a nih chang a awm thin. A nihna takah chuan Thlarau thianghlimin min khawih chuan danglam a awm tur a ni dawn lawm ni a tha zawngin..taksa chetna kan dawn hian awmzia anei tur a ni dawn lawmni. Kohhran hi kan kal sual tur min vengtu atana Pathian min pek a ni a, kohhran duh khoplo emaw mahni thu duh lutuk leh mahni thu kalpui tum tlat mi chu pawlchhuak an ni duh.

I chuanna lawngah Isua a chuan ve vangin tuifawn tuarlo turah in ngailo la, amah nen erawh chuan in pil ngailo ang.

“Nghet takin I ding ang, Beramno thisena inbualin

Lalber sipaite kanni, a thu min tiam ang zelin

Lallukhum ropui chu kan hlawh anga”