Khawvel zawng zawngah kal ula(outreach sermon)

“Khawvel zawng zawngah kal ula, thilsiam zawng zawng hnenah chuan Chanchintha hi hril rawh u” (Mark 16:15)

1.       “Kal ula”  tih chu eng a awmzia?

“Kal ula,” tih kan hmuh hian awmna hmun atanga kalchhuahna a entir. Hei hian a sawi tum tak ni a lang chu Zirtirte chu hmun hrang hrang a chanchintha hril tura tirhchhuah an ni tihna a ni. Isua hun lai hian thu inhlan chhawnna atana tha ber chu ‘Tawngkam’ ani mai a, chuvang chuan an mahni ngei kal a ngai ta a ni. Vawiin hun ah erawh chuan chu chanchintha chu hrilh dan kawng tam tak a awm ta!!

Lalpa’n Israel hnam chu Isua Krista Pathian anih zia leh chanchintha chu khawvel pum a hril tur  in a serh hrang a, mahse an hriatthiam duhloh avang leh kraws ah hial anlo khenbeh tak avangin, a thuhretu zirtir sawm leh pahnih te chu a tirchhuak ta anih kha.

Zirtirte chauh kha Krista thu hre tu annih avangin kal chhuak tura tih anni. Vawiina lokal khawmte hi Krista thu hretu kan  nih chuan he chanchintha kan hriat hi kan kal chhuah pui dawn lawm ni? Mi suaksual chu a awmdan kalsan tûra i hrilh loh chuan mi suaksual chu a khawlohnaah a thi ang a, a thisen phuba erawh chu i lakah ka la ang. (Ezekiela 33:8) tih kan hmu a, kan mawhphurhna liau liau a ni.

2.      Chanchintha chu enge?

Chanchintha tih hi Greek tawng “Euangelion” tin a tanga lak a ni a, a awmzia chu Isuan Pathian Pathian Ram chanchin a puanchhuah chu a ni (Mark1:14-15). Tin Pathian in khawvel tana a fapa a pek mihringa lo chang leh thi a, ropui taka kaihthawh a awm  chanchin chu a ni.(Rom 1:1-4, John 3:16). Pathian chuan vanrama kal vek leh chhandam ni vek  turin mi zawng zawng a duh a, chu mi thlen theihna atan chuan chhandamna a fapa thihna leh thawhlehna hmangin min siam sak a, chu chanchintha chu hril tura ruat kan ni(1Tim;2;4)

3.      Khawvel zawng zawng tih chuan eng chen nge a huam?

 Chanchintha chu a hretu tur a Pathian in aduh chu khawvel zawng zawng a chuan thilsiam zawng zawng tih a ni a, a huamzau thei hle awm e. Tin Mathaia 28:19 ah chuan hnam tin tih a ni bawk. Heta hnam tin tih hi Greek tawng a ‘ethne’ tih atanga lak a ni a, chumi awmzia chu Gentile hnam zawng zawng huap sawina a ni. Matthaia 24:9,14 leh hmun danga hnam atih ‘panta ta ethne’ hi chuan Israel hnam chauh a huam thung. Mi zawng zawng  tih a nih a vang hian rethei leh hausa, mingo leh mi hang,upa leh naupang, hnam hrang leh tawng hrang, ram hrang hrang a awm te  thlengin kan hrilh vek a ngai anih chu.(I Timothea:2:4) Kan sawi tak ang khan chanchintha hrihna atan a kan thawhna chu kawng hrang hrang ni mahse, thlei bik nei hauh lovin chanchintha chu kan hril tur a ni.

4.       Chanchintha hril chuan enge a tum ber?

Chanchintha chuan a tum ber chu misual chhandam a ni(Luka 19:10). Kan sawi tak ang khan rawngbawlna chi hrang hrang hmangin chanchintha hi hril mah ila, a tum ber thlarau bo chhandamna hi kan hriat reng a tul a ni. Tunlai kohhran tamtakte chuan rawngbawlna tha tak tak kalpui mahse, thlarau bo  manna a ni tih hre miahlovin a kalpui ve theih a ni. Rawngbawlna in a tum ber Thlarau bo chhandamna hi Pathian in a duh ber leh a thil tum a ni.Chumi tihlawhtling lo a rawngbawlna chu inkhel thiam tak, khelmual a mipui pawhin hmuhnawm an tih, mahse a pawimawh ber Goal a chhuih lut thei miah lo ang a ni ang. Chutiang mi chuan a tawpah dem an hlawh chawk thin.

Tlipna:

 Chanchintha chu kal chhuak a hrilh tura zirtirte tirh chhuah an ni ang khan vawiin a lokal te pawh hian chanchintha hril tur hian mawhphurhna kan nei theuh a ni.Krista min chhandamna leh chatuan lalram kan tan a buatsaih a awm thu chu hrilh darh tur kan ni. Kawng hrang hrangin chanchintha hrilhna atan hian kan thawk dawn lawm ni? Kal chhuak theilo te pawhin ke pen theihna kan nei theuh ang. Entirnan thilpek kawngah te, tawngtaina kawngah te, kan chhehvela mite hnenah leh kohhran chhung a chanvo hrang hrang kan neih ah te hian. Chanchitha hril hi Pathian hna min pe a ni tih ringtu chuan kan hre reng tur a ni.(Philipi 1:16)

Engtinnge nang Krista thu hretu khan chanchintha chu I tlangau pui ve dawn le?