Pathian thil phut rorelna dik

                                          PATHIAN      THIL     PHUT   RORELNA   DIK

                                                   Bible chang innghahna: Mika 6:8                   - Cadet Laldikkimi                                                                                                        

Thuhmahruai:

Pathianin Zawlneite hun lai atang tawha A mite hnena a thil phut chu Rorelna Dik hi a ni. Zawlnei Mika hi kum zabi 8-na hun laia  Zawlnei hna thawk a ni a, hetih hun lai vel hian ram a ralmuangin a hausa a, sualna pawh a nasa. Mi ropui leh hausaten mi rethei leh hnuaihnung zawkte an hnuaichhiahin an thil neih te dik lo takin an laksak thin. Dikna  a awm lova , inkhawngaih tawnna leh induhsak tawnna a awm hek lo. Hetiang a nih avang hian mi retheite tan chuan nun khawchhuah a har hle ang. Roreltuten dan an siam hi mipuite tana tha si lo, hotu leh roreltute tana tha hle si, pachhia te, hmeithai te, fahrahte leh mi chumchhe zawkte hrek zawng leh an chan tur laksak theihna dan a nih avangin dan chimawm tak heng mite tan hi chuan a ni ngei ang. Dik lo taka roreltute leh hruaitute an khawsak thin avang hian Lalpan ro a rel ve dawn a ni. Rorelna dik hi kan ram, kohhran leh kan nun honaah hian kan mamawh a ni.

1 .Rorelna dik kan ramah:

Bible-ah Israel te chu Pathianin a fa atan a thlang a, an chungah duhsakna leh khawngaihna  a lantir thin tih kan hmu. Nimahsela, Israel mite chuan lawmna chang an hre chuang lo. Aigupta ram atangin Pathianin a hruaichhuak a, chuti chung pawh chuan Lalpa lam an hawi duh chuang lo. Chu mai bakah he hun lai hian rorelna dik an tlachham em em a. Hei hi Lalpa duh loh zawng a nih avangin Zawlneite hian an dem nasa em em a ni. Lal Ahaban Nabotha lunga a den hlumtir hnuah  a grep huan a chhuhsak thu 1Lalte 21-ah kan hmu a. Amosa bung 2 thuah Israel mihausate duhamzia kan hmu, khawngaihna tel hauh lovin mi retheite an rapbet a, chutiang chuan sualna a nasa em em a ni. Zawlnei te chuan thahnem ngai takin  Pathian lam hawi  reng turin  Puithiam leh mipuite an fuih thin. Amaherawhchu an awih duh loh avangin hremna chu an pumpelh thei lo a ni. Kum B.C. 722-ah Assuria Sawrkarin lain mi 27,290 lai salah an hruai  a ni.

                Pathianin a phut chu rorelna dik a ni. Chu rorelna chu luipui angin  luang sela, felna chu luipui kang ngai lo angin luang rawh se, tih a ni (Amosa 5:24). Rorelna dik chu Pathian duh zawng a ni. Tunlai kam ram dinhmunah pawh hian Pathianin kan ram hruaitute laka a phut chu he rorelna dik tho hi a ni. Kan Pathian chuan mi retheite chungah leh hreawm tuar, pachhiate chunga dik taka rorel hi a phut  tlat a ni.  Seminar 1-a kan ram hruaitu lu berin a sawi hian rilru a tina ngei mai, hetiangin, Mizo zingah “Rei lo te thawh a, a tam thei ang ber hlawh tum an tam mai a ni,” a ti. Tin Mizo Officer-te an inthlahdah  a,   Kum 2008-a sawrkarna an chan hnuah sawrkar hnathawk 200 chuang an hrem tawh thu sawiin, Justice delay a nih chhan chu insawipui hnam kan ni a, Corruption vanga mante pawhin sawipuitu an nei tiin, mi sawipui thin zingah pawh kohhran hruaitute pawh an tel thu a sawi a. A pawiin hei hian kan ram dinhmun chiang takin a tilang awm e. Ram hruaitute tan pawh inenfiah a va tul em!  Pathian thinurna kan chungah a thleng mai ang tih a hlauhawm. Kan rama thil thleng mekte hi en ila, chhiatna rapthlak tak tak a thleng mek a ni. Lalpa hnenah sual thupha chawia inlam let a hun ta.

                Tuna zirlai la ni mekahte pawh hian ram hruaitu la ni turte, eng Department-ah emaw hruaitu pawimawh tak la ni turte pawh kan awm ngei ang. Chung mite tan chuan tun atanga kan ram hi vei a, rorelna dik mipuiten kan chanpual dik tak kan chan theihna tura thawk turin kan rilru kan buatsaih lawk hi a va pawimawh tehlul em!  Chutianga dik leh fel taka roreltute chungah chuan Lalpan a malsawmna  a tiam a ni(Leviticus 26).

 2. Rorelna Dik kan Kohhranah:

                Kan Bible chang innghahnaah khan Pathianin a phut, dikna leh khawngaihna ngainat tih khan mihring leh mihring inkar thu a sawi thei awm e.  Mika-te hun lai hian  dikna  a awm lova, tih tak takna tel lovin inthawina an hlan bawk thin. Pathian hnena inthawina la urhsun hle siten an mihringpuite an hmangaih theithlawt si lo chu Zawlneite hian an ngaithei lo a ni. Inhmangaiha, thianghlimtaka nun ho leh Pathiana intuluta  dik taka a rawngbawl hi Pathian ringtute nunah miten an hmuh a ngai a, khawvel mite laka an hriat hran theihna tur a ni.

                Kan tunlai kohhran dinhmun pawh hi han enin, han chhut ta ila, kohhrana Pathian rawngbawltute hian kan mite thlarau nun  hi kan hmangaih tak tak em? Chumai bakah kan member-te hian mi dik ka ni tih hriain min ring tawk em?  Keimah ang rilru leh ka thahnem ngaihna ang hi ka hruaitu nise ka ring ngamin ka awmna kohhran hruaitu atan ka lungawipui angem? tih hi lo chhut teh ang. Chu chu a bikin rawngbawltute tan a ni. Thufing pakhat chuan mi tha bula awm aiin mi dik bula awm a nuam zawk a ti a ni. A dik hmel viauin a rinawm a ni. Kohhran inlungrual leh inhmangaih ni tur chuan a tuate pawh mai hian kan thil thlir leh kan ngaihtuahte hi han dik phawt mai se, chuta tang chuan inpumkhatna a lo chhuak theiin ka ring a  ni. Mi dik leh rinawm bulah chuan tupawh mai hian thiltih sual palh kan hlau em em thin. 1Korinth 4:1-2 ah chuan Keini ho hi  Krista rawngbawltuah leh Pathian thuruk enkawltuah miin min ngai rawh se. Hetah hian enkawltu chu mi rinawm nih a ngai bawk a ni, tih kan hmu a ni. Pathianin a rawngbawltu atan mi rinawm leh dik a duh a ni, a chhan chu kan Pathian  hi Pathian dik leh rinawm a ni.

 Puithiam Elia  fapate sualna chu Lalpa mithmuhin a lo nasa ta em em a, mite chuan Lalpa hnena inthawina hlante chu an lo  ngaihnep phah a ni(1Samuel 2:17).Kohhran hruaitute chungah mipui mit a fu tih hriain hruaitu chuan dik leh felt akin a ti thin tur a ni.  Mi zawng zawng hian thian kawm bik kan nei theuhin a rinawm a, amaherawhchu kan rawngbawlnaah hian  mi thenkhat chauh thurchhuakin, mi dangte kan hlamchhiah chuan rawngbawltu hlawhtling tak kan ni thei dawn lo a ni. A chhan chu mi dangte rilru kha kan tum reng vang pawh ni loin kan tihnatsak thei a ni. Salvation Army Mission Statement-ah pawh kan hna bulpui ber chu chanchintha hril leh hleih nei hauh lova, Isua Krista hminga mihring mamawh phuhruk a ni. Malawi-a tuilian tuar mekte tan Chhandamna Sipai Pawlin  tanpui hna a thawk mek a ni. Sipai pawl hnathawh avanga mi chanhai leh harsatna tawk mekte mamawh tihpuitlinsaka a awm hi a lawmawm tak zet a ni. William Booth-a chu hleih nei hauh lova mite chunga rorel thin a nih avang mi tam tak ngaihsan a  ni.

               

3 . Rorelna dik  midangte tana inpek:

Pathianin kan hnena a phut chu  Amah nena thuhnuairawlh taka len dun a ni. Amah nena len dunna atang chuan mite hmangaihna nun a lo chhuak thin. Luka 10: 30-37-ah chuan Samari mitha tehkhin thu kan hmu a, hetah hian Jeriko leh Jerusalem inkarah mi pakhatin suamhmang a tawk a, he suamhmang  hian a vaw nek a, thi lek lekin a kalsan a ni. Chutihlai chuan Puithiam Jerusalema kal turin a hmu a, amaherawhchu a hel ta daih mai a, Levia chi, Puithiam ang bawka rawngbawltuin a rawn hmu ve leh a, a hel ve leh bawk a. A tawpah chuan Samari ram atanga lo kal, Jentail mi chuan a rawn tuamhlawm ta thung a. Suamhmang tawktu hi sakhaw hruaitu, Temple-a rawngbawltuten an pui lo. Kawng sira kal phah khawpin an hel. Temple-a rawgbawltu pawh ni lo, mi naranin a pui a ni. Pathian a hmangaihna chu tanpui ngai tanpuina atan a hmang a, hetianga hmangaihna hi mawhphurtu hnena thlen turin Lal Isuan, ‘ nang pawh chu bawk chuan ti ve rawh ‘ min ti a ni. Chatuana nunna kan neih theihna  tur chu kan thinlung leh  rilru zawng zawnga Pathian kan hmangaih mai bakah, keimahni kan inhmangaih anga kan vengte hmangaih hi a ni. A chunga kan sawi tak ang khian kan vengte chu a mamawhtute hnena kan  hmangaihna lantir hi a ni.

Thufingte 14:31-ah chuan Mi rethei hnehchhiahtu chu a Siamtu  hnehchhiah a ni a, Tlachhamte khawngaihtu chuan a chawimawi a ni, tih kan hmu, Pathian fak leh chawimawi fo hi kan tih tur a ni a, tlachhamte kan khawngaiha kan tanpui hian Pathian kan chawimawi tihna  a  lo ni. Kan chunga thil tha titu leh min duhsaktute  hnena thil tha tih leh duhsakna hlan let chu thil har lo tak leh thil nuam tak a ni zawk hial ang. Amaherawhchu, a mamawhtu hnen thleng phak rawngbawlna hi Lalpa min kohna a ni. Chutiang ang ni thei tur chuan Pathian nen thuhnuairawlh tak len dun a ngai a ni. Chuta tang chuan midangte hmangaih thei turin Lalpa’n tlawmna min neihtir thin. Chumi ang nun nei tur chuan ngaihsak  duh zawng leh hmelhriatte chauh ni loin min mamawhtu hnenah hmangaihna nun min neihtir thin  a lo ni.

Tlangkawmna:

                A chunga kan han sawi tak zawng zawngah khian  Lalpan Kan ramahte, kan kohhranahte leh a midangte tan rorelna dika rorel turin min duh a ni. Pathianin kan hnena a phut chu inthawina leh thil hlan mai ni loin Rorelna dik ngei hi a ni. Jeremia 7:22-ah chuan, “Ka aw ngaithla ula, in Pathian ka ni ang a, nangni pawh ka mite in ni ang; in that theihna turin in awm dan tur ka hrilh zawng zawng che u zawm rawh u,” tih kan hmu. Simna tel lo leh dikna tel lova halral thil hlanah Pathian a lawm chuang lo(Sam 51:16,17). Dik leh fel taka, thlei bik nei lova mi zawng zawng hnena Rorelna dik lantir hi Pathian thil phut leh duh dan a ni.  Lal Ahaba’n Nabotha lunga a denhlumtir hnuah a grep huan a neihsak a, Zawlnei Elija hmanga Pathian thu lo thleng,a chunga thil tha lo, lo thleng tur chu Lal Ahaba’n a lo hriat chuan inngaitlawmin, a puan a pawt thlera, saiip puan a sin a. Chuvang chuan Lalpan ama chhanah chuan thil tha lo ka thlentir lo vang a ti. Israel-te pawh an inlam let a, Lalpa thu an awih chuan Lalpan  ngaihdam a tiam thin a ni. Keini pawh chu chu Lalpa min tiam  a ni. Rorelna dik a lo awm theih nan mitin hian mawhphurhna kan nei vek a ni.

Kan ram, Kohhran leh mite chunga dik lo taka kan lo tih tawhte simin Lalpa hnenah sual thupha chawi ila, damna kan lo chan leh theih nan leh Rorelna dik  chu luipui anga a lo luan theih nan Lalpa’n Kan za atan mal min sawmsak rawh se