Johana 3:16 Textual Mizo

     Johana 3:16 (Textual sermon)

-           Lt. Malsawmdawngliana 21/2/17 @ Lungpho

“Pathianin khawvel a hmangaih em em a, tichuan a fapa mal neih chhun a pe a, tupawh a ring a piang an boral loha chatuana nun an neih zawk nan”

Thuthlung hluiah hian he khawngaihna lo lang tur hi alo sawi lawk tawh a, Pathianin Mosia hnena a dan pek ah pawh an bawhchhiat thawina dan tur chi hrang hrang a sawi a ni. Miin sual a tih a, Pathian dan a bawhchhiat chuan Beram no emaw, kel emaw no emaw a hlan tur a ni a, chumi nei ve zo lo tan, thuro emaw parva emaw a pawm tur thu a sawi a, chu pawh la nei zo lo tan chhangphut dip a pawm tur thu a sawi leh a ni.(Leviticus 5:6-11)

Fiamthu pakhhatah chuan miin khawvel hi  apumin nei se la, a nun chan silo se la, a tan a hlawk awm tih te awm a, nie a  nun a chan siloh chuan a hlawk hle ngei ang le.

He thu hi mi tam tak chuan Bible a thu ropui ber ni hial ten an ngai a, khawvelah hian sawi hlawh ber pawl a ni awm e . A then chuan Pathian thu rangkachak an ti hial a ni. He thu hi sawi theih dan a tam em em a, a thu hian a huam zau em em bawk a ni. Pathian hmangaihna thukzia te, kan tana thilpek a ui loh dan te, chhandamna thlengin a huam vek a ni.

Khawvel chu engnge –  Greek tawng chuan Kosmos tih a ni a. Khawvel tih hian leilung leh a chhung a awm zawng zawng a huam awm e, Isua thupek marka 16;15 ah pawh khawvel zawng zawnga kala thil siam zawng zawng hnena chanchintha hril tura tih kan ni. Mihring zawng zawng bakah a luah chin ram te a nih chu

Hmangaihna chu Thil pekin a zui – Pathian chu hmangaihna a ni, He ta hmangaihna hi “Agape” tih a ni a, hmangaihna thinlung emaw tawngkam a ka hmangaih che mai bakah mahni inhlanna a ni. Chu chu a thilpekah a lo langa a, a fapa mal neih chhun chu kan aia, natna leh hreawm zawng zawng tuar turin a hlana a ni, a neih chhun tak tak a ni a hlan ni. Mal neih chhun hi Greek tawng monogenes atanga lak a ni a, he thumal hi thuthlung tharah vawi kua hmuh a ni. A lokal na chu monos= only, a lone , genos= race, stock

A pe – Pek hi Pathian nungchang pakhat pakhat a ni. Thuthlung hluiah Israel te a hruai a, hnam sual leh luhlul tak an ni a, mahse thil tam tak an nun khawchhuah nan a pe a, a chang chuan ei tur te, in tur te, manna thlengin a chawm a, an hmelma te an kutah a pe bawk a ni. Amah chu nunna te, kan thawkna te, engkim min pe tu a ni bawk a(TT 17;25). Kan buh leh bal thlai te a that theih nan van atangin ruah te min pe a(TT14:17) Paula chuan a thilpek sawi hleih theihloh vangin Pathian hnenah lawmthu a sawi a ni(2 korinth 9:15)

Tu pawh a ring a piang– Tu pawh tih hian mi zawng zawng/thilsiam zawng zawng a huap a ni. (Mark 16:15) Khawvel ah hian mi hi kan han chikim khawp a, kim tak hi kan ni, a then zakzum em em te, zahpuiawm khawp a, zak theilo te, mi thau takte, thau tum em em thau thei hlek lo te.  Mi dum, a hang, ngo leh keini vun laklawh ho pawh, sakhaw mi em em te, sakhaw mi vaklo te, kohhran hrang hrang pawh, a ring a piang te tan a ni. Khawi kohhran nge, khawiah nge Babtisma I chan tih lam a ni lo, A huap zau zia hi, Juda ho tan chauh emaw, sum ngah leh khawpui mi chauh nilo in tu tan pawh , a ring duh a piang tan a ni. Kan rin mai kha kan damna a ni.

Mosia’n thlalerah dar rul a siama, a en a piang an dam thin a(Num. 21:9), mahse a then chuan an en duhlo, en se an dam ni mai tur a.Malaria damdawi hi kha zet mai hi Malaria vei zawng zawng tan a siam a ni a, mahse a ei tu tan chauh a ni. A ei duh lo a, a kha emai a thlum chi ka ei mai ang ti tan chuan damdawi kha engmah a ni lo. Isua hi mi zawng zawng tan a thi ni mahse, a ring duhlo tan chuan engmah a ni lo. “ tupawh A ring a piang” tih a ni.

Chatuana nun – Chatuan rei dan tur chu kan hria a, chatuana nun neih hlut dan tur chu ; tawp chin awm loin hlim takin kan awm tawh dawn tih na a ni, intihnat leh hreawm reng a awm tawh lo ang. Lal Isua thihna hneha a thawhleh khan, mihring tan thawhlehna a awm tih a nemnghet a, kan tan hmunsiama a kal khan kan thihhnu ah emaw, he khawvel piahah hian kuta sakloh in kan neih a tichiang bawk.

Salvation Army Thurin 6 na “A duh a piang ten chhandamna an neih theihna turin, Lalpa Isua Krista chuan a tuarna leh a thihna in khawvel pum tan tlanna a siam ta tih kan ring”.