Expository Sermon

Thupui: “Khawiahnge Judate lal lo piang chu?”

Bible: Matthaia 2:1-4

By- Cadet Joar Lalruatfela

Thuhma

Pathian thu thianghlim ilo ngaithla ang u. Matthaia bung 2:1&2

Tin, lal Heroda a lal laia, Judai rama Bethlehem khuaa Isua a lo pianin ngai teh, khaw chhak lam ata mi fingte Jerusalem khuaah an lo kal a, “Khawiahnge Judate lal lo piang chu? Khawchhak lamah a arsi kan hmu a, amah chibai buk turin kan lo kal a ni,” an ti a.

Lal Isua lo piang kha Khawvel thil thleng tawh reng rengah chuan thil pawimawh leh chhinchhiah tlak ber a ni a, mahse, Juda mi tam takte erawh chuan Mesia a ni tih an pawm duh tlat lo, Judate pawm dan chu lo dahtha ila, Chanchintha Mathaia ziak kan zir chian chuan, a ni chuan, Lal Isua lokal tur thu hrilhlawkna leh thlah chhawn chhuina chu Mesia a nihzia ti nghet turin a hmang a ni.

I.                   Hrilhlawkna thleng dik

A.     A pianna hmun

1.       Mika 5:2  - Bethlehem Ephratha (Judai, Luka 2:4)

a.       Mika ziaka kan hmuh angin Lal Isua lo pianna tur chu Bethlehem a ni a, Bethlehem chu Juda ram tam tak zingah te hle mahse roreltu tur lo chhuahna hmun a ni tih kan hmu a, chu hrilhlawkna tidik chuan Bethlehem khuaah Lal Isua chu a lo piang ta a ni.

b.       Amaherawhchu, chu hrilhlawkna ngei mai chu mi tam tak hriatthiamloh leh tibuaitu a chang ta a. (Johana 7:40-44) Davida thlah ze dinga lal lo chhuak tur leh chhandamtu tur chu Galili ram atanga lo chhuak a nih an ring thei lo a ni.

2.       Mi’n Isua chu Mesia a ni lo an tih dawn chuan Mika lehkhabu a hrilhlawkna hi a hnawl a ngai dawn tihna a ni a, mahse, Chatuan Pathian remruatna chu Bethlehem hmun tlawm te a ni si a, a tlawm em avangin Lal Isua, Mesia ni a an awih lohna pawh kha mihring lam atanga chhut chuan a awm viau tho a ni. Chu erawh chuan mihring finna a tihbo chian zia a tilang chiang hle a ni lawm ni?

B.     Aigupta ramah (Matthaia 2:13-15)

1.       Thuthlung hlui huna Pathianin Jakoba leh a chhungkua tam nasa tak laka a humhim ang khan (Genesis 45:5-7), A fapa nunna a humhim a ni. Vantirhkoh Josefa mumangah inlarin, naute leh a nu hruai a, Aigupta ram pan turin a ti ta a ni.

2.       ‘Ka fapa chu Aigupta ram ata ka ko chhuak a’(Matthaia 2:15)(Hosea 11:1) Thuthlung hlui hi Thuthlung thar hlimthla a nihzia lan chianna pakhat a ni he thu hi. Matthaia hian Lal Isua chu Pathian fapa a nih thu chiang takin a sawi a, Pathianina Aigupta ram atanga a koh chhuah leh tur thu pawh kan hmu a ni, heng thil thleng inchherchhuan zawng zawngte hi Zawlneite hrilhlawkna tidik tura Pathian ruahmanna chu a ni. Pathian inpuanna leh kaihhruaina chuan nausen Isua chu a veng zel a, chu chuan hrilhlawknate chu a zawh dik tir ta vek zawk a ni.

C.     Nazaret mi - Mihringte hmuhsit leh duh loh (Matthaia 2:23)

1.       Vantirhkohin Israel rama kir leh tura Josefa a hrilh khan Bethlehem lama kir leh ta lo chuan Nazaret an pan ta zawk a. (Luka 2:4,5) Nazaret an pan hian hrilhlawkna kha a thlen dik tir leh chiah mai a,anih loh leh, thleng dik nise eng hrilhlawkna ber nge ni ang?

a.       Nazareta Lal Isua kal tur thu hi fiahfai taka hrilhlawkna Thuthlung hluiah hian hmuh tur chu a awm lo na a, hrilhlawknate chu a tidik vek si a ni.

b.       ‘Ani chu mihringte hmuhsit leh duh lohvin a awm a,’ (Isaia 53:3) Zawlnei thuchhuak kan hmuh chu hmuhsit leh duhloh a ni dawn tih chauh hi a ni.

2.       Nazaret chu in chhui deuh teh ang, Nazaret khua hi Judate hmuhsit tak khua a ni a, a chanchin an ziahnaah pawh a chhe thei ang ber a ziah a ni thin, an rama khaw awmah chuan hlutna nei miahlo angte a an sawi chang lah a tam a ni. Nazaretah hian Gentile mi tam tak an cheng a, hei vang hian hmuhsit a hlawh em em a ni. Lal Isua pawh kha Juda mi in ti si a Nazaret a seilian a ni a, mi tam takin an hnawl chhan ber pakhat chu Nazaret khaw chhuak a nih vang niin an sawi thin.

II.                Lal pahnih: Khawi hi nge i tana piang zawk chu?

A.     Heroda hi Juda hnam a ni lova, lal dik tak pawh a ni hek lo.

1.       37 B.C - 4 B.C lai velin heroda hi a lal a, mi verther tak niin, thuneihna a duh em em a, nunrawng takin a lal lai pawh khan ro a rel thin a ni. A chanchin ziakna thenkhatah chuan a nupui pahnih leh fa pathum a that a ni awm e.

2.       Kan sawi tawh angin Heroda hi Juda mi a ni lova, Edom mi a ni, Judate chuan Davida Lal thutthleng ti bawrhbangtuah an ngai a, mahse, Heroda hian fing vervek takin Juda te chu an lungawi nan Temple a sak sak a ni.

B.     In an lohna

1.       Lal Isua chu Lal Davida lalthuthleng rochuntu leh luah tur dik tak a nih laiin Heroda chu Edom mi, Juda te lal anga in chhal a ni thung a.

2.       Lal Isua chu chhandam tura lokal a nih laiin Heroda chu tualthah hmang lal a ni.

3.       Lal Isua chu Lei leh Van lal ni mahse hniam teah a awm a, chutihlai chuan Heroda chuan nihna in vuah chawpin hmun sang takah a indah a ni.

C.     Judate lal chu Lei leh Van lal a ni, chumi tih dik nan chuan mi fingten Lal Isua chu chibai an rawn buk ta a ni. Mifingte kha Juda mi an ni lova, Persian mifingte an ni, hnam dang daih ni mah se, Lei leh Van lal chu a nihna tak hriain chibai an rawn buk ta a ni.

III.             Ze hnih

A.     Finna hi hlawm hnih lian takin kan then hrang thei ang, Khawvel lama finna leh Pathian lama finnain, Khawvel lama intifingte tan chuan an finna chu Pathian hlat tir tu a ni zawk a, Pathian lama an finna hmangtute erawh chu Pathian lamah hnuh hnaihin an awm tial tial thin. An zah a, A thu an awih a, chumiah chuan hahchawlhna tluantling a awm zia leh A lal zia an hmuchhuak thin.

B.     Mi tam tak chuan an chapona leh sualna avangin Lal Isua an hmu theilo fova, hriatlohna avang ten an Lal awmna chu an hrelo fo thin a ni. Keini hi han inzawt ila ‘Khawiah nge Judate Lal chu le?’ Mihringte hian ze hnih kan nei theuh a, kan ze tha lo zawk hi kan Lal kan hmuhna daltu a ni fo thin a ni.

Tlipna

Kan han sawilan tak atangte khan Lal Isua chanchin leh A pian hunlai a thil thlengte chu kan hrefiah vek awm e, a tam zawk chuan naupanlai atangin Lal Isua pian thu kan hre vek a, khawchhak mifingte chanchin nen lam, heti a nih mek lai hian ‘Khawi ah nge Juda te lal lo piang chu?’ Hrilhlawkna zawng zawng hmuh theihin a awm a, a thleng mek a, chutihlai chuan puithiamte chuan hrilhlawkna nei reng chung siin, Lal Isua pianna hmun atanga mel sarih laia hlaah an la awm si a,keini hi chanchintha hril inti siin khawi hmunahnge kan dina, boral mekte’n ‘khawiahnge kan tana lal lo piang chu?’ tia min zawhin thusawi tur leh hrilh tur engkim nei siin Chhandamtu hnen hruaithleng tur hian kan awmna hi a hla lutuk fo lo maw? Ringtu leh rawngbawltu ni a kan in chhal mek lai hian, kan aia chaklo leh tlawm zawk, ringlomi nia kan hriat thinte hian min lehpel mek a, kan Lal chu chibai min buk khalh mawlh mawlh tawh zawk a ni. Tute pawh lo ni ila, eng hna pawh thawk ila, khawi hmunah pawh awm ila, kan awmna hmun leh thiltihna hmun apiangah Lal Isua hi I pian tir zel ang u, Khawchhak mifingte’n arsi an zir a, Lal Isua an zir chhuak ang hian engkim kan tih leh zirnaah Lal Isua i zir chhuak theuh bawk ang u. Lalpan a thu malsawm rawh se. Amen..