Good friday sermon : Isua thusawi

KRAWS  CHUNGA  ISUA THUSAWI  PASARIHTE

                                                                 

            Kan Lalpa Isua Krista Krawsa khenbeh anih khan vawi sarih (7) a lo au chhuak a. He au-aw hian thil tih theihna nasa tak a nei a ni. Sawisak, diriam, cheksawlh hmuhsit leh hreawm tin reng tuartirin an khengbet a, chuta a tawngkam chu, midang ngaihsakna te, tawngtaina te, ngaihdamna thu te a ni, a va ropui em.

            PAKHATNA:: “ Tin, Isuan, “ Ka Pa, anni hi ngaidam rawh; an thiltih hi an hre lo a nih hi” a ti a ( Lk.23:34). He au-aw ( tawngtaina) hi a ropui takzet a ni. Hei hi Isuan abula awm Rom sipaite tan chauhva auvah ngai suh, nang leh kei atan pawh a ni. Lalnu Estheri chuan a mipui tan lal hmaah adil sak avangin thiturte tan zalenna chanchintha an hmu a (Est.4:16,7:4). Juda mipui ten an zain lal hmaah kalin an dil lo. Estheri pakhat dilna Aw lalin a pawmsak angin keini pawh Pathian hmaah mahnia kan dil theihloh laiin Krista ngaihdamna min dilsakna chuan Pa lung a ti awi a ni . Kristan itan a dilsak che hi a ropui i ti ve em? Kan hnaih theihloh Pathian lalthutphah hmaah Krista min dilsaktu kan neih avangin Pathianin “ An sualte leh an bawhchhiatnate ka hre reng tawh lo vang” a ti a ni 

            PAHNIHNA :: “ Tih tak meuhvin ka hrilh a che, vawiinah ka hnenah Paradis-ah i awm ve ang” a ti a (Lk.23:43). Krista vawihnihna au-aw chuan abula an khenbeh misual kha “ vawiinah ka hnenah Paradis-ah i awm ve ang” a ti a ni. He misual, nimin maia tualthat, rukru hi vawiinah chuan van mite bulah a cheng ve dawn ta a ni. Unau, nang pawh eng anga sual leh mi te nin leh en hran ni mahla, Krista angchhunga ilo let chuan, i ngaihtuahna sual chu alu a thisen chhuakin a silfai anga, nimina misualpa kha vawiinah van mipui nen tual khatah in lengdun dawn a ni. Krista hmangaihna angchhungah chuan misual ber pawn hmun a nei a ni.

            PATHUMNA:: “A nu hnenah, Hmeichhia, en teh, i fapa kha! a ti a. Tin, zirtir hnenah chuan, En teh, i nu kha! a ti a” ( Jhn.19:26-27). He thu hi Isuan a thih dawna a zirtir Johana leh a nu Mari hnena a tawng a ni. Mihring lamah chuan Mari hi Johana nu a ni lo, Johana pawh hi Mari fa a ni lo. Taksa dana Johanan Mari hi enkawl tur ni mahsela Thlarau danah chuan hnam thleibikna awm tawh lovin, pumkhat, Pathian chhungkua kan lo ni tihna a ni. Unau, khawvel danah chuan thisen dang dang, in zawm lo nimah ila, Krossah chuan hrinkhat, vanlam hrin, Lalpa pakhat, Thlarau pakhat, Baptisma hmunkhat leh rinna hmunkhata awm te kan ni. Chuvangin vanlam danah chuan eng hnam nge i nih? Eng thisen hrin nge i nih? tih aiin Pathian hrin i ni em? tih hi a pawimawh zawk a ni. Krista thihna Kross chuan a thisen zarah van khua leh tuiah ringtute min siam tawh a ni.

            PALINA:: “ Ka Pathian, Ka Pathian, engah nge mi kalsan?” (Mt.27:46-47; Mk.15:34-36). Aramik tawng, “Elahi,Elahi lema shebaqtani” hi Sam 22:1 Davida hla phuah a tanga lak a ni. Tlai lam dar thum velah chuan Isua chu aw ring takin a au a, ka Pathian, ka Pathian engah nge min kalsan a ti a ni. A bula awmte chuan an hrethiamlo hle mai a, Elija a ko anih dawn hi an ti a. Pathianin a fapa duhtak hi vawikhat mah a kalsan ngai lo va, Mahse Kross athlenin a Pa chuan a kalsan ta a nih kha. Pathian in a kalsan zawk chu misual  nang leh kei kan ni a, kan sualna zawng zawng (Pathianin min kalsanna) a tak taka aphurh vang khan Pathian in a kalsan kan ti thei awm e. Tichuan Pathian laka thi kan nihna te, kalsan kan nihna zawng zawng chu phurin a rawn thiat ta vek a ni.

            PANGANA :: “Ka tui a hal e” a ti a ( Jn.19:28). He au-aw hi maktak a ni. Tui nunglui nei tu chuan ka tui a hal a ti! Nga ti nge le?? ( Lk.16:24) ah chuan, mi hausapan meidil atang Lazara hnenah tui farkhat a dil a, mahse a hmu lo. Eden bawhchhiatna avanga nang leh keia chan tur pawh mi hausa pa ang hi a ni. Mahse Pathian fapa tui nung nei tu chuan kan ai-awhin Kross ah meidil a tuar angin “ka tui a hal” a lo tih tawh avangin, nang leh kei atan tih ve a ngai tawh lo. Krista hetia a au na hi van tuinung kan in theihna tur a ni. Unau, Kristan Krawsa a au hi i tan a ni. Mi hausa pa anga i au lohna tura au a ni. Ava ropui tak em.

            PARUKNA:: “A kin ta” a ti a. He ta “a kin ta” a tih hi Greek in “Tetelestai” an ti a, chu mi awmzia chu “ pe zo tawh, Leiba pe fel tawh” tih na a ni. Bible dangah chuan “ thu buai a fel tawh, a zo tawh” tia lehlin a ni. English version ah chuan, “ It is finished” a ti a, “ I am finished” a ti lo. Krista kha a zo tawh nilovin, a hnathawh a zo tawh tih na a ni. Unau, Kristan i sualman leiba a peksak tawh che. Bat then awm hauhloin sual lakah I nihna zawng zawng(I retheihna, hmelchhiatnaetc) nen a tlan ta che.

            PASARIHNA:: “Ka Pa, i kutah ka thlarau ka kawltir e” ( Lk.23:46). Hei hi Krista Krossa au-aw hnuhnungber a ni. A thih dawnin Pa kutah a thlarau a hlan. Ringtute thlarau pawh Pathian kutah a awm tawh avangin khawi hmunah pawh thi mah ila Kan Thlarau chu Pathian hnenah a thleng dawn a ni ( Kol.3:3 In thi tawh a, in nunna chu Pathianah chuan Krista hnenah thuhrukin a awm si a).

            Heng Isua thusawi te hi ama tan ni lo in, a hmangaih hringfa te tan a ni, a va ropuiin a va thlamuan thlak em, Pathian chhandam na chu hmufiaha, tuar a ngaih pawh a tuar ve ngam turin Lalpan mal min sawm rawh se.