LOCAL OFFICER LEH A MAWHPHURNA/ TIH TUR CHANPUAL

 

            LOCAL OFFICER LEH A MAWHPHURNA/ TIHTUR CHANPUAL

Khawi corps leh Society ah pawh CO te finna leh inpekna ah hian hlawhtlinna leh hmasawnna a in nghata, chutuh rual chiah chuan Local Officer te ah thui tak a innghat a ni. Salvation Army Administration hi Hierchycal form of church a ni a, General leh TC inzawmna a pawimawh angin, DC leh CO inzawmna pawh a pawimawh hle, chutiang bawkin CO leh LO te thawhho na leh tan ho na hi a pawimawh em em a ni. Thawhhona a that chuan rawngbawlna kawngah leh Army kalphungah malsawmna tamtak a thleng thin a ni. Tunah chuan Local Officer dinhmun tlem han zir ila, a vai chuan kan sawi hman dawnlo a, a bik in Senior Local Officer te han en hmasa ila :- Kohhran dang ang lo in keini ah chuan chanpual leh mawhphurna nei vek kan ni a, kan tih tur leh chanpual te, ziaka dah diak diak a har a, kan chanpual a tla chu zo taka kan hlen zel a kha min ko tu leh min ruattu duh dan a ni.

 

          1) CORPS SERGEANT MAJOR (CSM) : Mipui Vantlang enkawlna lamah a tul a piangah CO aiawha bultumtu a ni a. DC in remruatna dang a neihloh chuan CO awmlohna corps ah emaw CO awmloh laia Corps kaihruaitu a ni. Mi rinawm, Pathian mi, mi tak tak mite rin ngam a ni tur a ni. CO nen lungrual takin an thawk dun tur a ni a, chuvangin CSM chuan CO te a thawpui thiam a pawimawh hle a ni. Corps hotupa ber a ni tih a in hrereng tur a ni a, Corps chhiat leh that hi a kutah a in nghat a ni tih a hre tur a ni. Corps hi Pathian chakna hmanga a ven tur a ni. CO te chu mi hran hran inthlakin anlo awm zel anga, an chakna finna thiamna ang zelin alo hmang tangkai thiam tur a ni. Corps chhung thil engpawh a hria in, a ho khawm tha tur a ni a, Inkhawmna hun ruat te a puang thin anga, corps thanna leh hmasawnna tur pawh a ngaihtuah reng ang a, rilru leh thlarauah mi puitling ani tur a ni.

          2) CORPS SECRETARY : Corps rawngbawlna tinreng ah apawimawh em em a, a bik takin tangka lam leh a zat chhiarna (statistic) ziak lam reng rengah CO aiawha bultumtu a ni. Ziak lam thiamna neimi leh Corps a thilpawimawh ziaka dah tur reng reng a mawhphurtu ber a ni. Sum leh pai a lut leh chhuak chiangtakin a hria in a ziak anga, corps pawisa hmuhna kawngah pawh mawhphurtu ani bawk a ni.

            3) CORPS TREASURER : Corps a sum leh pai lam chungchangah CO ai awh a bultumtu a ni a, sum leh pai account lam thiam a pawimawh hle a ni. Mi rinawm anih a ngaia, sum leh pai him taka vawng thiam mi ani tur ani. Corps treasurer chu Corps sum leh pai vawnhim mai anilo a, sipaite thilpek lamah zirtirtu pawimawh tak ani tih a hriatreng a pawimawh hle a ni. Corps tana thilpek pe tha leh pe thalo hrechiangtu ber a ni a, a pe tha te faktu leh a pe thalo te fuihtu tur a ni. A theih hram chuan thlakhat ah vawi khat tal sipai te fuihna a neih thei chuan hmasawnna tam tak a awmphah ngei beisei a ni. Thusawina ah pawh thilpek lam nasa takin a uar tur a ni.

          4) RECRUITING SERGEANT : Rawn in pe thar leh lut thar te laka CO ai awha mawhphurtu a ni. Sipai inpe zo tak leh SA thurin hrechiang mi a ni tur a ni. Sipai lakluh leh pawla lawmluh turah te bul tumtu a ni bawk ang. Mirinawm leh mahni chanpual hrechiang mi a ni tur a ni a, mi nungchang tha, dawh thei mi, duhsak bik nei a ni tur a ni lo. PCC in sipai puitling ni tura a pawm kum 14 chunglam leh B/Roll atanga lawmluh tur te chu uluk takin recruit class a neipui thin tur a ni a, a mawhphurna hi a sang em em a ni. Sipai chaklo leh hnungtawlh te kan vel tu tur a ni bawk.

          5) COLOUR SERGEANT : Mei leh thisen puanzar chungchangah CO ai awh a mawhphurtu a ni a, puanzar hmanna chi reng rengah a bul tumtu leh a mawhphurtu a ni. Mual inkhawmah puanzar dik takin a keng anga, mipui hma a hruai thin tur a ni. Army kalphung leh puanzar hmanna tinreng hrechiang ber tu tur a ni. Tin, ceremony hman dan leh hman hun te hrechiangin, ceremony thil ah in pezo takin a tulna hmun a piangah kal thei tur mi ani tur a ni. Puanzar leh a ngul te fai leh zahawm taka vawn chu a mawhphurna ani bawk.

          6) QUARTER MASTER : CO aiawha Army property reng reng a chhiat a thata mawhphurtu a ni. Taima taka hnathawk thin mi anih a ngai, a hnathawh tur then khat te chu :

a) Corps luahlai leh corps in reng reng te athat leh chhiat thu ah mawhphurtu a ni a, a chhe laite a awm anih chuan CO hnenah report in, corps council in siam that dan tur a rel ang.

b) Biakin Chawkider that leh thatloh endik tu a ni a, hnathawh dan tur a kawhhmuh ang. Biakin leh Compound, quarter thlengin kawhhmuh tu tur a ni.

c) Kan properties reng reng chu anih tur ang ani em tih te a en fiah anga, siam that ngai a awm nih pawn CO hnenah a report thin ang.

d) Inkhawm na ah eng(light) te chu a tha tawk em tih a enfiah reng ang.

 

7) PENITENT FORM SERGEANT(PFS) : PFS hi kan hriat lar loh leh corps tam takin kan neihloh a ni awm e, kan zahngaihna dawhkan enkawltu a ni, siam that leh a thlak thu ah pawh mawhphurtu a ni. Zahngaihna dawhkan a lokalte chhinchhiahtu leh tanpui ngai an awm pawh a an inlam thlenga lo bawhzuia, an inhlanna te lo hriatsaka lo chhinchhiahtu a ni. Thlai thar leh thawhlawm kan lakkhawm zahngaihna dawhkana kan dah tawh hi a mawhphurna ani bawk.

8) WELCOME SERGEANT : Biakin leh Kohhran hun pawimawhah mite lo lawma lo welcome tu a ni a, An rawn inkhawm vanga lawmthu sawi pah in inkhawm zel turin alo sawmin alo fuih bawk ang. Mithar an rawn inkhawm in an dinhmun leh chanchinte CO hnenah a report thin ang.

 

HRUAITU NIHNA

Dr. John R Mott-a chuan, “Hruaitu chu kawng chin hria, kal hmasa a, amah zui tura mi dangte hnuk thei hi a ni,”a ti. President Truman-a chuan , “Hruaitu chu mi dangte an duh ngai loh tihtir/duhtir theitu a ni” a ti bawk. Hruaitu chu hotu anih tum a awm ang a, kaihruaitu, hmahruaitu, kilkawitu leh mawhphurtu a ni tum a awm bawk ang.

Hruaitu nihna ah a chiang tur a ni :  Kan Kohhran thurin ,thiltum, Sacrament leh Babtisma a hrechiang tur a ni. Victor Manogra-a chuan, “ Hruaitu chu pawl thiltum tipuitling tura mipuite kaihruai thei hi a ni,” a ti.  Mahni pawl thil tumah pawh mahni kan chian loh chuan inhruai a har. Hruaitu chu Pawl thil tumah a chiang ang a, chumi hlawhtlin nan chuan a theihtawp a chhuah tur a ni.

Ze nghet nei : Ngaihdan thlak zung zung thin, mi lelo tak nih a thiang lo. Rorel dan thuhmun lek tur a ni. Mi tuemaw an nih avanga ngaihdan dang nei a, mi danga ngaihdan dang nei leh chi nih loh tur. Pawlin a tum tihlawhtling tura ze nghet tak nei, principle nghet takin a kaihhruai tlat, rilru sawh sawn zung zung lo, ngaihdan thar apiang pawm duak duak satliah lo, thil thar leh ngaihdan thar  a awm pawha chik taka ngaihtuah hmasa hin mi nih tum tur a ni. Mi sawi hnuhnun apiang ‘a tha ang’ tih zel ngawt tur a ni lo a, ngaihdan thar leh rawtna thar dawngsawng thiam nih pawh a ngai. ‘Kan kal dan a ni lo’ tih ngawt aia ‘a ha zawk tak ang a’ tih theih hun neih ve fo a tha.

Rilru zau : Member mize inang lo tak tak kilkawitu hruaitu chu a rilru a zau a ngai. Thil dik lo pawmzam chuang si loa member ze tinreng dawngsawng thei tur rilru inhawng, buk lung pakhata mi dang tehfel ngawt ngai lo mi nih a ha.

Nelawm : Harsatna te, lawmna te, lungawi lohna te an thlen ngamna tura inhawng mi nih a tul. Intihnelawm tum lutuk avanga mi tih apiang tih ve theih hi a tha ber lo.  Nula kuah mai mai te, tlangval kuah mai maite hi intihnelawm tum dan tha lem lo tak a ni a. Zuk leh hmuam leh  Zu no dawmpui ve theih maihi LO te tih ve loh tawp tur a ni.

Rinawm : Thuruk vawng thei, kam tam lo nih a tul. Council thurel hi a puang chhuaktu turin a puan hmaa sawi chhuah vek rem lo a awm thei. Council chhunga thurel dan, ‘chu chuan chuti chuan a ti’ tih zawng zawng thlenga pawn lam miten an sawi theih chuan kan inenfiah a tha ang.  Sum leh paia rinawm mi nih tur a ni. Pawl sum hi a zahawm em em a, khawn tesep leh eng ilo a tam a, treasurer ni kher lo tan pawh rinawm a ngai vek mai. Mahni chhungkua leh nupui pasala rinawm nih hi hruaitu zahawmna pakhat a ni.

Rintlak :   Mawhphurhna hi hneh taka hlen chhuah tum thin  tur a ni. Run dalah  ti ve mai mai te hi chin ve loh a tha hle. Tlin tawka theihtawp chhuah ila “A ni kutah a awm a nih chuan a ngaihthatthlak e” an tih theih nan theihtawp chhuah a tha.

Dik lohna pawm ngam : Mi fel famkim kan awm loh avangin tisual thei kan ni. Tihsual pawm ngam, dik lohna pawm ngam nih hi mi puitling zia a ni. Ngaihdam dil te, thupha chawi te, dik lo tih inpawm ngam te hi LO te tih a mawi a ni. Rilru  puitling lo chuan chhuanlam an dap kual a, mawhpuh tur an zawng fo. Tlawm zawka  tan hi a tul hunah chuan hreh hauhloh tur a ni. Pawl in a thatpui zawk dawn chuan hruaitu chuan hmingchhiat  mawhphurhna leh thiam lo zawk nih pawh  phurh ngam a tha hle.